بطاطا مقلية؟ إيه! بس مين اخترعها؟

كل سنة، بـ13 تموز، بيحتفل العالم بـ اليوم العالمي للبطاطا المقليّة. ومن منّا ما بحب البطاطا المقليّة؟

كرمال هيك قبل ما تغمّسها بالكاتشب… تعرّف على أصل البطاطا المقلية!

من وين بلّشت البطاطا المقلية؟
 

في جدل كبير حول الأصل الحقيقي لهالأكلة.
البلجيكيين بيقولوا إنو هني اخترعوها بالقرن السابع عشر. بوقتها، كانو أهل الريف بمنطقة "نامور" يقلوا السمك الصغير، بس بالشتا لما يتجمّد النهر، صاروا يقلوا البطاطا بدل السمك!

أما الفرنسيين، بيرفضوا هالقصّة وبقولو إنو البطاطا المقلية بلّشت بباريس، وتحديدًا ع رصيف السين، وكانت تنباع من عربات صغيرة بشوارع المدينة.

وكيف وصلت لكل العالم؟

بالحرب العالمية الأولى، الجنود الأميركيّين داقوها ببلجيكا وما قدورا يستغنو عنها!
ومن وقتها أخدوها معن، وسمّوها "French Fries" لأن الناس بهديك المنطقة كانت بتحكي فرنسي.

أكلة عالمية بطعم محليّ

مع الوقت، البطاطا المقلية انتشرت بكل بلد وصار إلها لمسة خاصة بكل مطبخ.

ببلجيكا، بتنقدم مع صوصات غريبة وعجيبة.

ببريطانيا، بتجي مع السمك بصحن “Fish and Chips”.

وبالشرق الأوسط، منحبها نزيدها بالساندويش أو حد المشاوي.

وبكندا، في طبق شهير اسمو "Poutine"، مكوّن من فرايز، جبنة، وصلصة لحم.

وفي مطابخ بتزيد عليها جبنة التشدير.

بيومها العالمي، البطاطا المقلية بتذكّرنا إنو أطيب الأكلات أوقات بتخلق من أبسط المكونات.