نشرت كارول طُعمة مقطع فيديو عبر وسائل التواصل الاجتماعي، وجّهت خلاله رسالة إلى بلديّة البترون، مطالبةً بالتحرّك، خصوصًا عندما يتعلّق الأمر بالأطفال. وقالت طُعمة: "لأيمتى بدنا نضل ساكتين، نحنا أهالي البترون، بس وقت الأمور توصل لولادنا وأطفالنا وإهمالهن، لأ بدّه يوصل صوتنا وبدنا نحكي لأن أولادنا خط أحمر".
وأضافت: "نحنا البترونيّة سكتنا على سوء تنظيم السير ومشاكل الزبالة اللّي ما إلها حل، عالمستشفى وإهمال المستشفى من الوزارة المعنيّة، عالضرائب، البترون هي أغلى منطقة لأنّها سياحيّة وضلّينا ساكتين لتضل صورة البترون حلوة بنظر السيّاح والزوّار اللي عم يزوروها".
وتساءلت طُعمة عن دور البلدية قائلةً: "وين البلديّة من اللّي عم يصير؟ تجمّع روضة البترون الرسميّة لازم تضل بإدارة لحالها، ما فيها تندمج مع تكميليّة. أولادنا بدهن إهتمام خاص، إدارة خاصّة، نظار خاصّين، ومعلّمات ما فيهن يكونوا مع الكبار، بكل دول العالم بتكون الحضانة لحال والتكميلية لحال". كما قالت: "شفنا بكثير مناطق البلديّة وقفت مع الأهالي والنوّاب وصّلوا صوتهن للوزارة ورجعوا تراجعوا عن قراراتهن".
وختمت طُعمة بتوجيه سؤال إلى نواب المنطقة، قائلةً: "نوّابنا وين؟ الأستاذ جبران باسيل وغياث يزبك، إنتو وين من الموضوع؟".
